| Молитва перед иконой Смоленской Божией Матери |
О Пречудная и превышшая всех тварей Царице Богородице, Небеснаго Царя Христа Бога нашего Мати, Пресвятая Одигитрие Марие! Услыши ны, грешныя и недостойныя, в час сей молящияся и к Тебе со воздыханием и слезами пред пречистым образом Твоим припадающия и сице умильно глаголющая: изведи нас от рова страстей, Одигитрие Благая, избави нас от всякия скорби и печали, огради от всякия напасти и злых клевет и от неправеднаго навета вражия. Можещи бо, о Благодатная Мати наша, не точию от всякаго зла сохранити люди Твоя, но и всяким благодеянием снабдити и спасти; разве бо Тебе иныя предстательницы в бедах и обстояниих и теплыя ходатаицы о нас, грешных, к Сыну Твоему, Христу Богу нашему, не имамы Егоже умоли, Владычице, спаси нас и Царствия Небеснаго сподобити, да спасеннии Тобою славим Тя и в будущем веце, якоже спасения нашего Виновницу, и превозносим всесвятое и великолепое имя Отца и Сына и Святаго Духа, в Троице славимого и поклоняемаго Бога, во веки веков. Аминь.
